引用:
原帖由 處長 於 2007-4-6 01:06 發表
蝦王點解蝦毛都無隻
往樹已成胸..還魚一夢中...
唔好揭佢傷疤喇.
不過我死幾千蚊蝦都無野. 唔洗怕呀蝦王.
呢個世界等緊你呀!!
我諗蝦王唔玩蝦除左前排死蝦呢個原因之外.
從蝦王既眼神同埋神情之間. 感覺到蝦王言談間既希虛.
我諗死蝦係導火線. 無人玩蝦先係主因!!
自己一個玩. 無人吹水都幾鬼悶.
話雖香港近. 但係下下要過去買蝦買補品都麻煩.
大家有眼見. 少人講野.
多人潛水.少人發言.
想玩蝦玩草既朋友們. 唔洗驚貴GA
D 蝦D 草死死下. 買買下. 咁就慣GA喇.
到而家小弟有一點都係未諗通.
點解水草同蝦呢個市場咁冷.
到底係唔捨得消費. 定係其他原因.
以前係台灣玩草玩蝦. D 新貨大家都係搶住要.
相反澳門. 搶黎搶去都係果幾個.
係澳門. 玩草既人其實唔少. 但係都係隱形人.
點解我會咁講??
平時黎我鋪頭買草既有兩種人.
一種係等新貨玩家. 都係果幾個人.
一種係C拉呀叔小朋友. 見到D 草好靚. 買少少番去玩.
大部份人第一句說話彈出黎. 都係問:
有咩水草可以唔洗理都唔會死??
有乜魚唔想洗理但係又會肥肥白白??
答案明顯只有一個.
就係 假水草同埋木魚
當然我唔會咁樣回答客人.
最近鋪頭多左一種客人. 就係淨係黎換氣既客人.
佢地平時從來都無蒲頭. 無黎買過野.
一黎就係黎入氣. 我發現好多呢種客人.
但係唔知點解. 佢地從來未黎買過草.
蹤使佢地唔黎幫襯. 咁佢地又係邊度同人吹草經. 同人分享自己既成果??
起碼都黎呢度蒲下頭呱.
但係. 呢度常發言既又有幾個??
有交流. 先至會有進步.
即使有時大家有思想衝突. 言語鬥爭.
我覺得都唔緊要. 因為大家只不過係想維護自己既理念.
呢D 都係正面既.
世界上無免費午餐. 無付出永遠唔會有收獲.
付出既唔係指金錢. 而係心思.
有錢. 可以將人地既心思買番黎.
但係享受同埋樂趣絕對不同.
自己一手一腳整出黎而又得到別人既認同.
呢個先係真正既樂趣所在.
玩魚玩草玩蝦.
每個人都會有唔同既理論
係網上.朋友.同埋書本吸收知識後.
再通過自己既試驗同埋實踐.
自己將問題一一解決. 果種滿足感.
唔係金錢同埋其他所有物質能夠比美.
以前剛剛學玩草. 無人帶無人教.
自己晚晚都上網搵資料. 日日都睇到2 3點先訓.
真係讀書都無咁勤力. 再同朋友慢慢討論.
透過不同方式既試驗. 慢慢累積左好多經驗.
例如我好鐘意試唔同方式既用品組合.
從來唔會盲目咁追隨市場之大勢
例如我鐘意用好多唔同光管
NEC. phlips. Osram. TFC. Dennele. Ada. Hagen. Arcadia
只要有得到過正面評價既產品我都會試.
呢樣野唔係我開鋪之後有更好既資源先咁樣.
上述既產品. 係我讀緊書果陣已經試過曬
又例如液肥方面.
TMG. ADA. TBS. 自製. AZOO同埋一D 少聽到既肥料都試過.
CO2溶解系統.
唔同牌子既杯. UP出既缸內溶解器. B牌台記溶解器. 呀諾溶解器.
每種都有透過PH 錶量測其溶解度.
其實水族真係一門極高深既學問.
好多問題好難解釋.
例如有一次我想寫一篇文章討論CO2溶解既問題.
我分別用細化杯. UP401. B牌同呀諾擴散做一個溶解度既數據分析.
首先排除左PH 錶既誤差.
我得到既數據係呀諾擴散=B牌擴散>杯擴散=UP缸內擴散.
(係呢度打一個岔. 呢個結果明顯推翻左澳門某某水族館自稱最好用就係UP缸內擴散)
最後呢一個溶解度既文章無出到街.
原因係細心思考後. 發覺問題實在太過complex.
比如換水之後. PH會上升好多. CO2溶解既速度又會唔同
因為換完水. PH上揚後. 再打CO2. 水既PH降得好快.
如果無換水. 又會保持平穩狀態. 每日既溶解度都會差唔多.
但係後尾發現. 咁樣又會產生另外一個問題. 就係NO3既累積.
NO3累積又會令到PH下降. 如果換水. 又會令到成個系統從零開始.
所以係一個有生物既草缸. CO2溶解問題好難討論
真係好難搞.
最後. 希望同睇到呢篇文章既朋友講一樣野.
就係係呢個板甚至成個論壇講野. 唔洗有諱忌位.
意思即係話. 講野唔洗就住就住講. 我成日都會驚有呢D 問題發生.
因為自己身份既尷尬而搞到影響左言論自由.
比如有時小弟鋪頭既野貴. 或者小弟鋪頭既產品質素唔理想.
都希望各位大大聲講出黎. 唔好因為小弟既身份既左右到大家既言論.
各位讚小弟既鋪頭. 我會更加努力.
如果鬧小弟既鋪頭. 我會更加更加努力. 有批評先會有進步.
其實係開鋪前. 我有同壇主要求辭去版主一職.
原因係想避免一D 尷尬既情況.
但係高層話無問題. 所以小弟又繼續做餅主.
最後簡單作結
呢個論壇. 唔屬於我. 唔屬於任何一個人.
係屬於大家.
大家都能暢所欲言.
有交流. 先至有進步.
整體質素提昇. 相言就可以吸引到更多更多既新人入會!!!
